شعر الصديقه والاخت نبراس ياسر

ليش اتعطلت يمه العصر فات
اوبدت تعصر ابروحي المغربيه

هلاهل ترس صدري اوبيدي جكليت
اوكبل اسبوع مشتريه الهديه

اتاني اوخبر عاجل طگني بالگاع
انفجار الجامعه المستنصريه

ولك يمه وصلتك ازحف ازحوف
لأن رجليه ماتن گبل اديه

لگيت اكتابك اوماشفتك اوياه
عفته اشلون مو رحتو سويه

اوجثه اتصيحلي من بين الرماد
موهيه گلت وآنه ادري هيه

حاجيني دخيلك ياضوه العين
الشضيه الصابتك موبيك بيه

انا اشتاگيت ابوس اجفوفك اليوم
ابگد مابوست انته بديه

وصية والدك بيدي آنه احنيك
ترضه ايگول خلت بالوصيه

اعرفك غيره كلك تذبح الموت
اوتگعد بس اشگ ثوب العليه

اعز الناس جنت اتگلي ياحيف
اعز الناس ذلتهه المنيه

ياجف القدر المن انمديت
ليش اتناوشت نجم الثريه

ابني البجت لمصابه الحمامات
وغتاظ الگمر ونخسف ضيه

ابني ابن العراق اوامه بغداد
ياهو الكتب مجهول الهويه

الف شكر الج يا اختي العزيزه نبراس انه شعر رائع وجميل اتمنالج كل التوفيق وانشاء الله ان تنشري المزيد ليرتقي المنتدى بهذه الابداعات وشكرا
اخوك : علي الشامي الخاقاني
مدير منتدى سحر الخيال :